Өфөлә «Йәш һөнәрмәндәр» WorldSkills Russia-2021 чемпионатының милли финалы башланды

Рәсәйҙең 76 төбәгенән килгән ҡатнашыусыларҙы сәхнәлә сәләмләнеләр. Амфитеатр битләүенә бер нисә мең тамашасы йыйылды. Өфө күгендәге аэростаттар тантананың күркәм биҙәге булды — сәхнә һәм тантана тамашасылары өҫтөнән «Самрау» Бөтә Рәсәй һауала осоу фестивале спортсылары осоп үтте.

«WorldSkills планетаһы» — оҫталыҡ һәм һөнәрмәнлек планетаһы байрамды асыу сараһының төп темаһы булды.

Ойоштороусылар ҡунаҡтарға башҡорт халҡының мәҙәниәтен күрһәтергә тырышты: сәхнәнән ҡурай моңо яңғыраны, милли кейемдәрҙәге артистар сығыш яһаны. Тамаша сәхнә өҫтөндәге яҡтылыҡ шоуы менән оҙатылып барҙы.

Чемпионатта ҡатнашыусылар Өфөләге ярыштарҙың үҙенсәлекле гимнын эләктереп алды: «Был Өфө, был WorldSkills».

Сәхнәнән ҡатнашыусыларға Владимир Путиндың сәләмләү телеграммаһын уҡып ишеттерҙеләр. Ул йәш һөнәрмәндәргә уңышлы сығыш яһауҙарын теләне һәм остаздарға, тренерҙарға уларҙы әҙерләгәндәре өсөн рәхмәт белдерҙе.

Халыҡ-ара йыһан станцияһы бортынан WorldSkills ҡатнашыусыларына йыһан сәләмен еткерҙеләр, ә Башҡортостан Башлығы Радий Хәбиров чемпионатҡа тантаналы старт бирҙе.

Йыһан темаһын дауам итеп, яҡтылыҡ диодлы меңләгән дрон Өфө күгенә күтәрелде. Пилотһыҙ осоу аппаратттары ҡатмарлы фигуралар һәм яҙыуҙар булып теҙелде. Шул рәүешле «Ватан» паркы өҫтөндә Салауат Юлаев һәйкәленә «йән инде», Рәсәй төрлө төҫкә инеп емелдәне, уртаһына герб төшөрөлгән Башҡортостаныбыҙ йәшел төҫ менән балҡыны.

Тамашасылар быны иҫе китеп ҡарап торҙо.

Һуңынан сәхнәлә популяр йырсы Егор Крид сығыш яһаны.

Фото: Башинформ

Видео: Ильяс Ҡасҡынов

#Ағиҙел
#АғиҙелЖурналы
#WorldSkillsRussia
#Нацфинал2021
#НацфиналУфа