Ырымбурҙар йәнә өлгө күрһәтте

Бөтә донъя башҡорттары ҡоролтайы ошо ялдарҙаБашҡорт мәҙәниәте һәм мәғрифәте көндәре сиктәрендә Ырымбур өлкәһенең башҡорт йәмәғәт ойошмаларының етәкселәре һәм әүҙем ҡатнашыусылары һәм шулай уҡ республиканың Мәҙәниәт министрлығы, Мәғариф һәм фән министрлығы ағзалары менән берлектә ЗУМ платформаһында осрашыу үткәрҙе. Конференция бик фәһемле үтте, сит өлкәлә йәшәү шарттарында ла Ырымбурҙарҙың мәктәптәрҙә башҡорт телен уҡытыу проблемаларын ярайһы уңышлы алып барыуҙары һоҡландырып ҡына ҡалманы, үҙебеҙҙең Башҡортостан эсендә лә ҡайһы саҡта туған телдәргә илке-һалҡы ҡараштар осрауын хәтерләтеп, Ырымбур башҡорттарынан күп нәмәгә өйрәнәһе әле тигән уйҙарға һалды. Юҡҡа ғынамы ни, бынан сирек быуат элек атаҡлы шағир Рауил Бикбай бер журналистың сетерекле һорауына яуап итеп: “Ҡырҙан килгәндәр тип ҡыр тибергә ашыҡмағыҙ, беҙ һеҙгә мәҙәниәт алып килдек”, – тимәгән. Был яҡ башҡорттары бөгөн дә заман һынауҙарына бирешмәй һәм күп яҡтан Башҡортостандағы милләттәштәре өсөн өлгө лә булып тора. Онлайн-осрашыуҙа былтыр ғына ойошторолған Ырымбур өлкәһенең башҡорт теле уҡытыусылары ассоциацияһының кәңәшмәһен ойоштороу ҙа тәҡдим ителде. Был осрашыуға дистанцион рәүештә Башҡортостандың Мәғариф һәм фән министрлығының белгестәрен дә ҡушыу кәрәклеге әйтелде. Ассоциацияның етәксеһе, Төйлөгән районы Аллабирҙе ауылы мәктәбенең элекке директоры Сания Ҡуҙбаева райондағы мәғариф өлкәһендәге мәсьәләләр хаҡында һөйләне.