Салауат ӘБҮЗӘР
ҠАТТАР
...Көтмәгәндә ығы-зығы
Ҡупты беренсе ҡатта.
Ҡалын-ҡалын стеналар
Һелкенеп ҡуйҙы хатта.
Икенсе ҡаттар шомланды:
“Ни булды икән аҫта?
Әгәр ҡоторған бәндәләр
Ишекте тибеп асһа?!.”
Шиккә төшкән икенселәр
Бикләп ҡуйҙы ишекте.
Был тауышты өҫтәгеләр –
Өстәгеләр ишетте.
“Ни булды?” – тип һоранылар
Улар икенсе ҡаттан.
“Бер ни ҙә юҡ” – тигән яуап
Бирҙеләр аҫҡы яҡтан.
Дүртенселәр хафаланды:
“Хөрткә оҡшаған эштәр!
Тиҙ арала асыҡлайыҡ,
Ни әйтер икән өстәр?”
Өсөнсөләр яуапланы:
Ҡурҡыныс түгел эштәр,
Байрам шаулай, тип әйтегеҙ,
Һораһа әгәр биштәр...”
Ошо хәбәр китте өҫкә –
Бишкә, алты, етегә...
“Йорттоң беренсе ҡатында
Гөрләп байрам ителә!”