Дуҫым тураһында һүҙ

Уңдан - һулдан өйрәтәләр,
Йолаларҙы оноттом.
Ялтырауыҡҡа әүерәп,
Мәғлүмәттән тонсоҡтом.
Тынлыҡ кәрәк тын алырға,
Тын алайым бер тала.
Һеҙгә, бәлки, еңелдер ҙә,
Еңел түгел уртала.
Урталыҡта һауа етмәй,
Күк көмбәҙе юғары.
Табалмаһам үҙ көйөмдө,
Тағы берәү юғалыр.
Ғашиҡ булыр мәлем етте -
Миңә бөгөн ун ете!
Нәфсем пәрҙәләрен асып,
Көнгә бағыр көн етте.
Ете диңгеҙ аръяғынан
Ымһындырған әүрәткес.
Зәңгәр экран төпкөлөнән
Томалаған ғәйрәт-көс.
Мин бит үҙем үҙем түгел,
Әйтерһең, терминатор!
Үҙ телемдең тәмен белмәй
Сит телдә термин аттым.
Сит илдәрҙең тутыйғошо
Ҙур күренгән бөркөттән.
Аҙғын уйҙар яйлап-майлап,
Зиһенемде өркөткән.
Шәрә ҡыҙҙар шәре кеүек,
Ғәйрәтемде ашаған.
Сит-ят көйҙәр ситлек булып,
Күңелемде ҡоршаған.
Уянмаҫ та инем, бәлки –
Ялған хыял ойота.
Жигулиҙар тауыҡ кеүек,
Бөркөт кеүек Тойота.
Күрше ҡыҙы сәләм бирҙе,
Йылмайыуы шаңҡытты.
Кемлегемде оноттом да,
Оноттом мин ваҡытты.
Үткәндәргә алып ҡайтты
Туған телдәге сәләм!
Һаумы, сибәр башҡорт ҡыҙы,
Үәғәләйкүм әссәләм!
Ҡайҙа үҫтең? Ник күрмәнем
Толомоңдоң зәңгәрен?
Ҡай арала өлгөрҙөң һин,
Әйтсе, ҡасан үҙгәрҙең?
Ни булды һуң? Ни хикмәт был?
Юҡ иттең барбиларҙы.
90-60-90, тигән,
Аҙғын хыял - самаларҙы.
Иртән һиңә яусы барыр,
Иҫкә төшөр йолалар.
Аҙан, зекер кире ҡайтыр -
Йома булыр йомалар.
Ир булырҙай мәлем етте,
Ҡоршауҙарҙы емерәм.
Ҡурҡма һин, иртән өйҙә бул.
Бер һүҙ - яусы ебәрәм!
Ғашиҡ булыр мәлем етте!
Башҡорт ҡаным уянды!
Ҡала, тиеп, ҡасып китһәң,
Ғәйрәтемде тоярһың.
Тыным менән тартып алам,
Көнләшһен терминатор.
Майҙан тотам һабантуйҙа
Шөрөптәр һанап ятыр.
Бәйге тотор мәлем етте,
Арғымаҡҡа атланып.
Сәпкә тейер һәр бер уғым,
Сәпкә тейер атҡаным.
Күрше ҡыҙы, күрсе, ҡыҙый,
Көйөм бар ҙа, йырым юҡ.
Иртән түгел, бөгөн барам -
Йөрәгемә урын юҡ!

Радик Өмөтҡужин