Бөтә яңылыҡтар
Шиғриәт
22 Апрель 2021, 10:43

"Ҡатын булыр өсөн талант кәрәк" Зөһрә Ҡотлогилдина

Ҡатын булыр өсөн талант кәрәк —Артист бит ул тормош-сәхнәлә.Бер ҡараһаң, осоп-ҡунып йөрөй,Бер ҡараһаң, күҙе йәшләнә. #Ағиҙел#АғиҙелЖурналы#АғиҙелШиғыр#Шиғриәт#ЗөһрәҠотлогилдина

Ҡатын булыр өсөн талант кәрәк

Ҡатын булыр өсөн талант кәрәк —
Артист бит ул тормош-сәхнәлә.
Бер ҡараһаң, осоп-ҡунып йөрөй,
Бер ҡараһаң, күҙе йәшләнә.

Бер үк көндә комедияһы ла,
Трагедияһы ла уйнала.
Инде көлөп-илап бөттө тиһәң,
Драмала тәрән уйлана.

Әле генә бөйөк әсә булһа,
Ут уйната эштә ҡулдары.
Бешереүсе, йыйыштырыусы ла –
Һанап бөткөһөҙ бит ролдәре.

Ә кис етһә, үҙ иренең янына
Һөйәркәләй килә – уйнашсы.
Талант булһа ғына был тормошта
Төп ролдәрҙе оҫта уйнаусы.

Талантһыҙҙар сәхнәләрҙән китә,
Уйын түгел тормош уларға.
Бер дөрөҫлөк: шатлыҡ икән – көлә,
Ҡайғы икән – ҡала иларға.

Үҙең булып йәшәү ауырыраҡ,
Асылыңда бәхет туйларға.
Әгәр һиндә йондоҙ булып балҡыр
Талантың юҡ икән уйнарға,
Хәйерлерәк түгел микән: залдан
Тик тамаша ҡылыу уларға?..

Зөһрә Ҡотлогилдина.
Читайте нас в