Ағиҙел
-10 °С
Болотло
75 лет Победы
Бөтә яңылыҡтар
Шиғриәт
14 Февраль 2021, 09:00

Байыу

Күмгел-күкһел тамырҙары бүрткән Өлкән ҡулын һалып тубыҡҡа, Әллә ҡайҙа ҡараштарын төбәп Ауыр һулап ала юҡ-юҡта. Күҙен йомоп йылмайыуға сума – Ғашиҡ сағын иҫкә алғандыр, Баш сайҡаған ыңғайына баҫып, Кире ҡолай аҡ сәс-ҡылғандар. Өйөп ҡуйған ҡаралтылар ише Һыр өҫтөнә ятҡан һырҙары Әллә ҡайҙа була бер тынаға Тыңлағанда “Юлдаш” йырҙарын. Шатлығын да, ҡайғыһын да хәҙер “Э-эй-й-й”, – тигән бер һүҙ аңғарта. Ойой биреп, сеймәлеп тә бөткән Ғүмер ебен ҡабат тағата.

“Аллаһ-Аллаһ”, – тиеп билен тотоп
Үҙенә көйә, үҙен шелтәләй,
Баһаһыҙ ғына ҡарап башҡаларға
Эскәмйәлә ултыра көлтәләй.

Ҡояш көлтәһеләй яҡты ғына
Арыған һыны инде еп-еңел.
Тик уйҙары ғына арыу тарта,
Ауыр тарта ҡарҙай аҡ күңел.

Ап-аҡ, эйе, тик фәрештә түгел,
Үкенестәр хатта бер арба.
Уйҙан уйылып күңеле ҡыуарһа ла,
Теләге юҡ биҙәп-буярға.

Бөгөнөнә тыныс баға ала,
Үҙ үткәне ҡиммәт үҙенә,
Ҡарт ҡулдары көҙгөгә үрелә лә
Тертләп китә сабый күҙенән,
Тертләп китә сабый күҙенән...

(Гөлнара Хәлфетдинова шиғыры)
Читайте нас в