Башҡорт әкиәте гагауз телендәге балалар китабына инде

“Молдавия хөкүмәтенә ҡараған Ғағауыз автономиялы территориаль берәмегенең баш ҡалаһы Комратта ғағауз балалары өсөн уникаль китаптар серияһы донъя күрҙе,” ­ тип хәбәр итте төрки донъяһында билдәле ғалимә-тюрколог, шағирә, йәмәғәт эшмәкәре Гюллю (Гөлли) Каранфил. Гөлли ханым һуңғы йылдарҙа хатта ғағауыз ауылдарында ла балаларҙың туған телдәрендә һөйләшмәй, башҡа телдәргә өҫтөнлөк биреүенә, туған теленең юғалыу ҡурҡынысы аҫтында тороуына бик борсола һәм был эс бошорғос процесты туҡтатыу өсөн көсөн йәлләмәй ҙур эшмәктәрлек алып бара. Ул инде байтаҡ йылдар үҙ иҫәбенә ғағауыз телендә әҙәби журнал сығарып килә, төрлө саралар ойоштора. Ике йыл элек Төркиәнең YTB ойошмаһын менән килешеп, улар иҫәбенә ғағауыз балалары өсөн заманса, сифатлы, эре хәрефтәр менән баҫылған сағыу китаптар сығарыу хыялын тормошҡа ашырыуға тотоноуға өлгәшә ул. Пандемия арҡаһында эштәр тотҡарланып торһа ла, быйыл, ниһайәт, китаптар Комратта донъя күрҙе. Балаларға тәғәйенләнгән был серия өс китаптан тора. Беренсеһендә ғағауыз халыҡ әкиәттәре һәм ғағауыз телендә яҙыусы авторҙарҙың әкиәттәре урын алған. Икенсе китапҡа молдаван, үзбәк, әзербайжан, башҡорт, ҡаҙаҡ һәм рус телдәренән ғағауызсаға тәржемә ителгән халыҡ әкиәттәре ингән. Өсөнсө китап иһә мәктәпкәсә һәм мәктәп йәшендәге балалар төрлө милли байрамдарҙа һәм сараларҙа ҡуллана алырлыҡ шиғырҙарҙан тора. Китапты әҙерләүҙә проект етәксеһе Гөлли Каранфилдан тыш тағы ла 11 рәссам 1 мөхәррир һәм үҙҙәре педагог та, әсәй ҙә булған 5 ғағауыз ҡатын-ҡыҙ яҙыусылары ҡатнашҡан. Тиҙҙән уникаль серияның презентацияһы уҙасаҡ, китаптар ғағауыз балаларына бушлай таратыласаҡ.

Башҡорт әкиәте гагауз телендәге балалар китабына инде