Бөтә яңылыҡтар

АҒИҘЕЛДӘ БОҘ ТАУЫШЫ

Ағиҙелдә боҙ киткәнен ҡарап торғанда күңелдә әллә ниндәй уйҙар ҡайнаша башлай. Шул боҙҙар менән нимәлерҙер мәңгелеккә киткәнен дә, күп нәмәне юғалтҡаныңды ла аңлайһың: Бала сағың. Атайың. Әсәйең. Туғандарың. Дуҫтарың. Өфөгә тәүләп аяҡ баҫҡандағы йөрәк тибеше.Тәүге һөйөүең. Мөмкинлектәрең. Тыуған яғыңа табан ашҡыныулы талпыныуың. Ихласлығың. Һаулығың. Ваҡытың. Ғүмерең...

Ғүмерең, тигәндән йәшерәк саҡта уҡ ошо шиғырҙы яҙып ҡуйғанмын. Ысынлап та, һиҙмәйбеҙ икән, ғүмеребеҙ үҙебеҙ менән түгел, эргәбеҙҙән генә үтеп барғанын. Ағиҙелдә боҙ киткәнен күҙәтеүем шуны йәнә иҫкәртте:

Ағиҙелдә боҙ тауышы
Йәнебеҙҙе өтә.
Боҙҙар кеүек ҡуҙғалышыр
Мәлебеҙҙә икәү,--
Ғүмер генә тигәнебеҙ
Яныбыҙҙан үтә.
Яҙмағандыр инде беҙгә
Йәшәүҙәре бергә.
Йәнебеҙ бер, түгел юлдар
Бергә, берләм генә.
Ғүмеребеҙ үтеп бара
Эргәбеҙҙән генә.

14.04.2021
Әхмәр Ғүмәр-Үтәбайҙың "Мең дә бер күҙәтеүем" яҙмаларынан
432-се күҙәтеү.
фото "башинформ.рф" сайтынан алынды