Бөтә яңылыҡтар

"ЙОҘРОҠТАРЫМ ТӨЙНӘЛДЕ..."

Академтеатр сәхнәһендә Салауат башҡорт дәүләт драма театрының Башҡортостандың халыҡ яҙыусыһы Ноғман Мусин повесы буйынса "Ғүмерҙең бер мәле" спектакле бара. Райманды Әмир улым башҡара. Сценарий буйынса Редактор Раймандың бит-муйынын миндек менән ҡайыҙлай башлағас, үҙем дә һиҙмәҫтән, йоҙроҡтарым төйнәлде. Көскә үҙемде тыйҙым, миндек битемде семетте. Сәхнә булһа ла, уйын булһа ла, улыңдың йөҙөнә һуғыуҙарын кисереүе ауыр икән, дуҫтар. Шуға күрә лә спектакль һуңынан театр коллективы күмәкләп фотоға төшкәндә яндарына барманым. Улымдың дуҫы Радик Ғәлиуллинға ҡаты бәрелеүҙән ҡурҡтым. Һуңынан һыуынғас, рәхәтләнеп көлдөм. Алйот!Ошоға оҡшаш бер хәл-вағиға ла иҫкә төштө шул саҡ. Азамат Ғафаровтың бала сағында атаһы Фидан Ғафаров "Ғәлиәбаныу" спектаклендә Хәлилде уйнаған. Исмәғил Хәлилде атып үлтергәс, Азамат сәхнәгә йүгереп сығып, Исмәғилде йоҙроғо менән төйгөсләй башлаған...

Тағы ла шуныһы, Әмир улым Радикҡа спектакль башланыр алдынан: "Залда минең атайым да була, теге урында ныҡ һуҡма, йәме?" — тип иҫкәртеп ҡуйырға ла онотмаған икән. Нимә генә булмаһын, миндә шундай тойғолар барлыҡҡа килеүен актерҙарҙың уйнау оҫталығы тип баһаларға мөмкиндер. Береһен дә айырмайынса, барыһы ла — афариндар!
Спектакль, дөйөм алғанда, бик оҡшаны. Психологизм бик нескә.
Режиссеры Лиана Ниғмәтуллина заманса ҡоролмалар, технологиялар ярҙамында ҡасандыр совет осоронда барған ваҡиғаларҙы хәҙерге заман тамашасыһына яҡынайта алған.
25.03.2021
Әхмәр Ғүмәр-Үтәбайҙың "Мең дә бер күҙәтеүем" яҙмаларынан
423-сө күҙәтеү.