Ағиҙел
-15 °С
Болотло
75 лет Победы
Бөтә яңылыҡтар

ТАБИПТАР АҘЫРАҠ ЙӘШӘЙМЕ?

Мәшһүр медицина докторы, ғалим Владимир Бехтерев (1857-1927) үҙенең "Рәсәйҙә табибтарҙың хәле һәм уларҙың эшмәкәрлеген өйрәнеү" тигән хеҙмәтендә Баш мейеһе институты лабораторияһында үткәргән тикшереүҙәренә таянып табибтарҙың башҡа һөнәр кешеләренә ҡарағанда 10-20 йылға аҙыраҡ йәшәүе хаҡында яҙып үтә. Интернетта был йәһәттән бик күп мәғлүмәт килтерелә.Бөрйән районында тыуып үҫеүсе халыҡ табибы Марат Ишмөхәмәтов та (мәрхүм, ауыр тупрағы еңел булһын!) ошо турала китаптарында яҙғайны. Был хәлдең сәбәптәрен ул табиб һөнәренең йоғошло ауырыуҙар йоҡтороу йәһәтенән хәүефле булыуын һәм уларҙың кеше физиологияһын яҡшы белеүенә бәйләп аңлатҡайны. Уның фаразы: табиптар башҡаларҙан 17 йылға аҙыраҡ йәшәй.


Тәүге сәбәп бер ниндәй ҙә шик тыуҙырмай, ә бына икенсеһенә килгәндә Марат ағайға һорауҙар биреп, бәхәсләшеп алғаныбыҙ ҙа хәтерҙә. "Табиптар ошо һөнәргә уҡыған саҡта теге йәки был ауырыуҙың, сирҙең нисек барлыҡҡа килеүен, үҫешен мәйеттәрҙе ярып өйрәнгәс, үҙҙәрендә лә шундай уҡ сирҙәр барлыҡҡа килгәндә уйҙары менән күҙ алдына килтереп, киреһенсә, тиҙ генә үҙҙәрен ҡырҡыу хәлгә еткерә. Был хәл уйҙың, фекерҙең матдиләшеүе тип атала", тигәйне халыҡ табибы.
Марат ағай шулай уҡ ябай кешеләргә үҙҙәренең сире хаҡында артыҡ белергә ынтылыуын да, серәкәй тешләһә лә, юҡ сәбәпте бар итеп табибҡа йүгереп барып анализдар тапшырыуҙы ла өнәп еткермәне.
Әлбиттә, был фекерҙәр бәхәсле, ҡапма-ҡаршылыҡлы, шулай ҙа, диагностикалау үҙәгенә барғандан һуң табибтарҙың ҡиммәтле-ҡиммәтле дарыуҙарға бит-бит рецептар яҙған сағында Марат ағайҙың һүҙҙәре иҫкә төшә барыбер ҙә.
10.02.2021
Әхмәр Ғүмәр-Үтәбай "Мең дә бер күҙәтеүем" яҙмаларынан
399-сы күҙәтеү.
Читайте нас в