Ағиҙел
-10 °С
Болотло
75 лет Победы
Бөтә яңылыҡтар

МӨХӘББӘТ ШАҒИРЫ ИНЕ...

Бөгөн 11 ғинуар, ҡәләмдәшебеҙ, күренекле шағир Рәмил Йәнбәк ысын донъяға ҡайтып киткән көн. Ысын донъя, тиеүем дә һүҙ уйнатыу түгел. Бигерәк тә ғүмеренең һуңғы йылдарында Рәмил ағай тормоштоң сәйәси ваҡиғаларға бәйле ғәҙелһеҙлектәрен иҫкә төшөрөп, донъя менән хушлашыу кәйефенә ҡоролған шиғырҙарҙы күп яҙҙы. Һуңғы сыҡҡан "Иртә көҙ" китабының аҙаҡҡы өлөшө тотошлайы менән шундай шиғырҙарҙан тора. Үтә нескә хисле, ажар тойғоло, ваҡыты менән бауһыҙ ашҡыныулы ла шағир ине ул. Нимә генә тимә, йәшәй килә, уны күңел ҡайтыуҙарына дусар иткән сәбәптәр ҙә аҡлана килә һыҙланыуҙарын да аңлайбыҙ. Шағир күп нәмәне алдан тойған, һиҙгән, күргән.Вафатына 3 йыл да үтеп киткән. Уйлап ҡараһаң, кисә менән бөгөн араһында ваҡыт ҡына. Шағирҙың ғүмер мөҙҙәте лә. Ысын мәғәнәһендәге егет, тоғро дуҫ, арҡа терәр иптәш, мөхәббәт шағиры ине Рәмил ағай!Һеҙҙең иғтибарға уның ғүмеренең һуңғы йылдарында яҙылған ике шиғырын тәҡдим итәм:

БАРЫБЕР
Оҙон коридорҙан атлап киләм,
Бик оҙон ул, оҙон коридор.
Нимә көтә уның аҙағында?–
Минең өсөн инде барыбер.

Һөйгөм килде, бик һөйөлгөм килде –
Яҙҙар үтте кеүек аралап.
Аллаға ла күпме ялбарҙым мин –
Табылманы изге дауалар.

Һуңланыммы? Әллә иртә тыуҙым –
Бушҡа уҙа төҫлө ғүмерем.
Мин, ахыры, ерҙән киткәстен дә
Үҙ-үҙемде эҙләп йөрөрмөн.

...Оҙон коридорҙан атлап киләм,
Бик оҙон ул, оҙон коридор.
Аҙағында, бәлки, яҡтылыҡтыр –
Тик ул инде миңә барыбер.

КИСӘ МЕНӘН БӨГӨН АРАҺЫ
Үкенестәр томаланып ҡалды
Ҡыҙыу үткән йылдар араһында.
Кире ҡайтыу мәңге мөмкин түгел,
Артҡа күпме боролоп ҡараһаң да.

Ҡыуаныстар, ҡомда алтын төҫлө,
Төҫһөҙләнде ҡайғы араһында.
Хыял-өмөттәрҙән нимә ҡалһын,
Яҙмыш гелән тырнап тараһын да.

Бәргеләнәм, диңгеҙ һыуҙарылай,
Кисә менән бөгөн араһында.
Алдағы көн, әйҙәп, ҡулын болғай —
Ынтылыш юҡ. Килмәй бараһым да.
11.01.2021
Әхмәр Ғүмәр-Үтәбайҙың "Мең дә бер күҙәтеүем" яҙмаларынан
388-се күҙәтеү
Читайте нас в