Бөтә яңылыҡтар

Әхмәр Ғүмәр-Үтәбай. Мең дә бер күҙәтеүем. 226-СЫ КҮҘӘТЕҮЕМ: "Ғүмәр, һин уйнайһың түгелме?"

Әхмәр ҒҮМӘР-ҮТӘБАЙ МЕҢ ДӘ БЕР КҮҘӘТЕҮЕМ 226-СЫ КҮҘӘТЕҮЕМ: "Ғүмәр, һин уйнайһың түгелме?" Үткән быуаттың 50-се йылдарындағы бер фотоға барып юлығыуым атайыма һәм уның дуҫтарына бәйле хәтирәләремде яңыртты. Унда ҡурайсылар сығыш яһай. Уңдан һулға: Ғүмәр Үтәбаев (Буранбай ауылы), Азамат Хәмитов (Буранбай), Әхмәтғәле Фәйзуллин (Таулыҡай), Фәррәх Аралбаев (Буранбай). Улар Буранбай сәсәндең туранан-тура нәҫеле Абдрахман олатай Буранбаевтан ҡурайҙа уйнарға өйрәнгән. Атайым һөйләгән ҡыҫҡа ғына хәтирә. Улар Өфөгә сығыш яһарға килгәндә ҡунаҡханаға урынлашҡан. Атайым, Фәррәх, Азамат ағайҙар бер номерҙа йәшәгән. Иртәнсәк асыҡ тәҙрәнән кемдеңдер "Әрме"не ҡурайҙа уйнап ебәргәне ишетелгән. --Ғүмәр, һин уйнайһың түгелме? — тип һораған Азамат ағай... --Эйе, ул уйнай, "Әрме" уныҡы — тигән Фәррәх ағай... Улар икеһе бер юлы карауатында ятҡан атайыма ҡараған. Ауыҙында ҡурайы-фәләне күренмәй... (Артабан — сайтта)

...Атайым уларға барыһын да һөйләп биргән. Әле магнитофон тигән хикмәттең ныҡлап таралмаған, күптәр әле уның нимә икәнлеген дә белмәгән мәл булғандыр инде. Баҡтиһәң, Нефтекама яғынан ҡурай моңон яратҡан бер кеше Өфөгә ҡурайсылар килеүен ишетеп, махсус рәүештә баш ҡалаға килеп, ҡунаҡханаға урынлашып, бер көн алда атайымды бүлмәһенә саҡырып уйнатып, бер нисә көйҙө яҙҙырып алған булған икән.