Бөтә яңылыҡтар

Әхмәр Ғүмәр-Үтәбай. Мең дә бер күҙәтеүем. 210-СЫ КҮҘӘТЕҮЕМ: “Ҡурайға һәйкәл”

Хәйбулла районының Йәнтеш ауылы ир-уҙаманы Юныс Иштанов һәр ваҡыт ауылдаштарын һоҡландырып, ғәжәпләндереп йәшәй. Йәшерәк сағында тереләй бүре алыр алдынан ҡайтып ауылдаштарын таң ҡалдырһа, аҙағыраҡ ауыл янындағы иң бейек тауҙан трактор менән төшөп аптырата, һуңғараҡ осорҙа Яңы йыл алдынан йорто янына әкиәт ҡаласығы төҙөп, ағастан төрлө һауыт-һалалар эшләп, республика халҡы иғтибарына лайыҡ була. Быйыл май байрамдарына иһә...

Ауыл янындағы Тәкәл тауы башына Ҡурайға һәйкәл ултыртты. Бындай һәйкәлдәр хәҙерге ваҡытта бихисап. Юныс Иштановтың һәйкәле иһә иҫкән ел ыңғайына әйләнеп ултырып, алыҫтан ҡарағанда Уралтау түбәһен бар тулылығында йәмләп ултырған ҡырлы ҡурайҙы хасил итәсәк. Һәйкәл авторы был ижад емешен Башҡортостандың 100 йыллығына, Муса Мортазин ғәскәре сафында автономия яулауҙа ҡатнашҡан атаһы Рәхимйән Иштанов, ҡайныһы, Бөйөк Ватан һуғышы яугиры Ғәлимйән Исҡужин һ.б. ата-олаталарына, изге яуҙарҙа ҡорбан булған ауылдаштары рухына бағышлай.