Ағиҙел
-16 °С
Болотло
75 лет Победы
Бөтә яңылыҡтар

Әхмәр Ғүмәр-Үтәбай. 184-се күҙәтеүем: "Ауылға ҡайтып үлеү — выгодно!"

Яҡын күргән дуҫ ағай үлем түшәгенә ятҡас, еңгәй шылтыратты: "Тиҙ арала килеп ет, ағайыңдың хәле ауыр, һиңә әйтер һүҙе бар..." Барып өлгөрмәнем. Ағай үткән. Еңгәй тетрәндерерлек һүҙ әйтте: "Ағайың һуңғы һулышын алып, үтеп тә өлгөрмәне, ҡайҙан белгәндәрҙер (Ғазраил шымсылары барҙыр - Ә. Ғ.-Ү. ), "Йыназа" хеҙмәтенән шылтыраттылар, хеҙмәттәре күпме торғанлығын да әйткәндәр — 70 мең самаһы..."

Үткән шәмбелә ауылда яңғыҙ йәшәгән бер апай менән һөйләшеп киттек. Апай пенсияла, осон-осҡа ялғап саҡ йәшәй, пенсияһы газ, электр энергияһы һ.б. өсөн түләүҙәрҙән артмай. Ауыл хакимиәте ниндәйҙер дөйөм мәнфәғәт өсөн аҡса йыя, апай түләй алмай, уға: "Әгәр ҙә аҡса бирмәһәң, үлгәндән һуң ауыл зыяратында һиңә урын булмай", – тип әйткәндәр. Бер саҡ уйынлы-ысынлы итеп: "Егеттәр, ауылға ҡайтып үләйек, ауылға ҡайтып үлеү — выгодно. Туғандарың һинең өсөн түләүле булмаясаҡ..." — тип шаяртҡайным. Өлгөрмәнек, капитализм ауылға ла барып еткән икән...

Читайте нас в