ИФТАРҒА НИМӘ АШАРҒА?

Ифтарҙы нимәнән башлайбыҙ?

1. Ике стакан эҫерәк һыу эсеүҙән. Ни өсөн эҫе һыу? Сөнки ашҡаҙан һыуҙы тәғәйен температураға тиклем йылытмай, ә  организм эҫе һыуҙы шундуҡ һеңдерә. Һәр ағзаға, һәр күҙәнәккә, лимфаға һыу тиҙ барып етә. 

2. Бер-ике финик ашайбыҙ. Организмда глюкоза кимәле төшөү сәбәпле, уны күтәрәбеҙ.

3. Намаҙ уҡып алғас, инде ашарға ултырабыҙ. Нимә ашайбыҙ? Көнө буйы ял иткән организмды йәшелсә менән ҡыуандырабыҙ. Йәшелсәне быҡтырып та ашарға була. Туҡлыҡлы булһын тиһәгеҙ,  әҙерәк ярма (ҡарабойҙай, дөгө, тары, һоро), һыуҙа бешкән балыҡ ашарға мөмкин. Емеш-еләк менән дә һыйланабыҙ!

4. 20-30 минуттан һуң эремсек, курага, йөҙөм менән сәй эсәбеҙ. 

5. Ифтарҙан һуң берәй сәғәт үткәс ғәҙәттә һыуһата башлай. Йылы һыу эсәбеҙ. Көндөҙ ашамай йөрөүҙән организмдан минералдар йыуылып төшә, шуға күрә бер стакан минерал һыу эсәбеҙ. 

Ифтарҙа ит ризыҡтары ашап, аш эсеп, пирогтар менән сәй эсһәк, сәхәрҙә ашағы килмәүе мөмкин. Сәхәрҙә еңелсә генә сәй эсһәк, көндөҙ хәл бөтә, көс булмай, асыҡтыра. Шуға ифтарҙа ғарҡ иткәнсе туйыу төп маҡсат түгел.

Ураҙа мәлендә нисек бауырҙы таҙартырға? Расторопшаны ҡулланабыҙ. Уны ифтар, сәхәр ваҡытында бер бал ҡалаҡ ашайбыҙ. Даими рәүештә таҙарынып торғандарға 5 көн, ә кем яңы бауыр таҙартырға йыйына, уға 10 көн эсергә тәҡдим ителә.

Полисорбты (энторесгель) ла онотмайбыҙ. Беренсе 5 көндә йоҡларға ятыр алдынан эсәбеҙ. Үлгән бактерия, бәшмәк кире һеңмәй, ҡанды ағыуламай. Ҡан ағыуланмағас, баш ауырымай, ҡан баҫымы күтәрелмәй.  Кискә йоҡлар алдынан 1 стакан йылы һыуға 1 аш ҡалағы Полисорб эсергә. Әгәр Полисорб булмаһа, күмер ашарға ла мөмкин. 

Мәғлүмәт: "Ғүмерем бер генә, ҡәҙерен бел генә!" ВК төркөмө.