Тамара ҒӘНИЕВА
АУЫЛ БАЛАЛАРЫ
Тапай-тапай кеше тупһаларын,
Хеҙмәтсеһе булып хужаның,
Ауылдарҙың үкһеҙ балалары
Һемерә генә һурпа нужаһын.
Ауылдарҙың зирәк балалары
Йығылып ятып эстәй аң-белем.
Хыялдары - халҡы яҙмышы һәм
Мәртәбәһен тотоу иленең.
Эш ашауҙамы ни, баш һау булһа,
Һөтлө сәй ҙә кәртүф. Тамаҡ туҡ!
Фән докторы, китап яҙыусы ла,
Барса халыҡ йәшәй шулай уҡ.
Көйҙәр беҙҙең моңло, һағышлыраҡ,
Һирәк сөнки уйһыҙ сағыбыҙ.
Өйҙәребеҙ тупһаһына бәйле
Ғүмерлеккә кендек бауыбыҙ.
Нәфсебеҙ ҙә артыҡ ҙурҙан түгел,
Өҙөлөп бара никтер иңебеҙ.
Ауылдарҙың зирәк балалары...
Ауылдарҙа ике күҙебеҙ.