Әхмәр ҒҮМӘР-ҮТӘБАЙ
Әҙерлек
Атай-әсәйҙәр беҙҙе яңы уҡыу йылына, мәктәпкә ҙур тырышлыҡ һалып әҙерләй инеләр. Иң ҙур әҙерлек Магнитҡа кәзә дебете һатырға барғанда булды: улар һәр ҡайһыбыҙға кәмендә 1-2 йылға етерлек кейем-һалым, уҡыу әсбаптары алып ҡайта ине. Беҙ, малайҙар иһә, үҙебеҙҙе оло тормош юлына әҙерләнек: тәнебеҙҙе сыныҡтырҙыҡ, гер күтәрҙек, йүгерҙек, көрәштек, ҡылыс алыштыҡ, туҡмала-туҡмала һуғышырға өйрәндек. Әрмегә, ҡалаға уҡырға китер алдынан урыҫсаға, үҙебеҙҙе сит кешеләр араһында тоторға өйрәндек. Апайымдар кейәүгә сығыр, ағайым өйләнер алдынан атай-әсәй геү килеп йыл һуҙымында туйға әҙерләнде, апайымдар бирнә, ҡәйнеш-бикәстәренә бүләктәр, беҙ иһә ҡәйнештәргә бәкеләр хәстәрләнек, ҡыҙҙар әсәй, егеттәр атай булырға әҙерләнде...
Йәшәй-йәшәй, баҡыйлыҡҡа ла әҙерләнергә ваҡыт килеп етә икән ул. Тик унда нимә алып китергә һуң? Алып барып буламы? Барыһы ла тороп ҡала. Ҡулдан әйбер төшөп китә, бары телең генә доғалар ҡабатлай...