Айҙар МАННАНОВ
КҮРШЕ АТЫ
(Күршем Вәлитов Хәкимйән Сәмирхан улының яҡты рухына бағышлайым).
“Ат биреп тор әле, ағай...” –
Мохтажлыҡ ине атҡа.
Күпме тапҡыр мин ат һорап,
Йөрөнөм бала саҡта.
С. Әбүзәр.
Белеп үҫтем бала саҡтан –
“Күрше хаҡы – Тәңре хаҡы”н.
Кәрәккәндә керә инем
Ут күршегә, һорап атын.
Йәлләп бирер ине уны,
(Ат йәнле ине ағай):
“Тиктомалға ҡыуалама,
Яндырып ҡуйма, малай”.
Күршем ихатаһы ҡотһоҙ, –
Аты ла юҡ, үҙе лә.
Күктәге бер яҡты йондоҙ
Оҡшаған ат күҙенә.
Ул ат ҡалды бала саҡта,
Иҫәндер кеүек һаман.
Ҡайһы саҡта төштәремдә
Мин уға менәнеп сабам...