Бөтә яңылыҡтар
Дөйөм мәҡәләләр
22 Июль 2019, 12:27

Ҡара күбәләк.

“Ағиҙел” журналының август һанында Рәсүл Байгилдиндың “Ҡара күбәләк” повесы донъя күрә. ...Аяҡ тауыштары һилләнгәс, тәҙрә ҡаҡтылар. Антонина килгәйне. Анастасия, эске күлдәктә генә көскә тәҙрә аша төштө. Изге күңелле күрше ҡатынға, бер сәғәттән генә, уянды, әбрәкәйгә сыҡты, тип дежур табипҡа әйтергә ҡуштылар. Анастасия апаһы алып килгән күлдәкте, кәзәкәйҙе кейҙе һәм туғандар төнгө ҡала өйҙәре араһына инеп юҡ булды...


Апаһы Анастасияны тимер юл станцияһына алып барҙы. Сараға тиклем составҡа ултыртты. Унан Башҡортостанға ылау күп йөрөй, шуларҙың береһенә эләгеп башҡорттар яғына сығырға ҡушты. Ситтә һине бер кем дә эҙләмәйәсәк, тине.


Шулай итеп, Сталин репрессияһы ҡорбаны Анастасия, тыуған иленән ҡасып, эҙ яҙлыҡтырып, Буребайға барып юлыҡты. Белеме булған шәфҡәт туташын мәғдән сығарыу приискаһы дауаханаһына шунда уҡ эшкә алдылар.


Ярты йыл да эшләп өлгөрмәне, үҙенән күпкә өлкән башҡортҡа – Матрай ауылы кешеһе Зыяетдин Байгилдинға бисә булды ла ҡуйҙы. Аңғармай ҙа ҡалды – өс балалы ир, ғаиләһен ташлап, уны, егерме йәше лә тулмаған ҡыҙҙы, ҡырағай азиат йолаһы буйынса, урлап алды ла китте. Кем бит әле: үҙе белемле, үҙе коммунист, үҙе мәктәп директоры. Хәйер, тәүҙә һөйөүен, башын юғалтыуын әйтте, анттар бирҙе. Аңҡы-тиңке йөрөгән ҡасҡалаҡтың күңелен ҡуҙғытты.