Бөтә яңылыҡтар
Дөйөм мәҡәләләр
28 Май 2019, 12:01

Һөйөнсө! Ижадыңды халҡың күптән танығайны, ниһайәт, дәүләт раҫлап ҡуйҙы. Тамара Ғәниева – Башҡортостандың халыҡ шағиры! Ҡотлайбыҙ!

Тарихи сәғәт һуҡты! Күренекле шағирәбеҙ, "Ағиҙел"дең яҡын дуҫы, ҡәләмдәшебеҙ Тамара Әхмәтшәриф ҡыҙы Ғәниева Башҡортостандың халыҡ шағиры тигән маҡтаулы исемгә лайыҡ булды!

Кеше күңеленең, халыҡ рухының иң мөҡәддәс тойғоларын йөрәгендә йөрөткән, бер кем дә баҙнат итмәгән кисереш сөңгөлдәренә төшөп фекерләй алған, ырыуына хас ғәййәрлек менән башҡаларға ҡалҡан була алған, оло фиҙаҡәрлек менән изге ғәмәлдәр ҡылған, өмөт өләшкән, күптән инде халыҡтыҡы булған ҡәләмдәшебеҙҙең, ниһайәт, республикабыҙ етәкселеге тарафынан рәсми рәүештә танылыуы беҙҙең өсөн дә ололарҙан-оло байрам. Илгә танылыуың менән, хөрмәтле ҡәләмдәшебеҙ!


ИЛГӘ ҺҮҘЕМ


Бәп-бәләкәй буйлы бер ҡатын мин,
Теләһәгеҙ - яугир ҡатын булам.
Теләһәгеҙ - мин йөк аты булам.
Теләһәгеҙ - тойғо-хискә тулам.


Башҡортомдоң йәне, усағы мин,
Тәсбих тартып илгә ғәм юраусы.
Доға ҡылып ергә ҡот һораусы,
Моңһоулыҡтан моңсол йыраусы.


Күк ҡөҙрәте миндә - бағымсылыҡ,
Халҡым ихтыяры - сәсәнлегем.
Тәбиғәттән - күндәм бисәлегем,
Ил алдынла бурыс - әсәлегем.


Һыҙланыуҙар ята иңдәремдә,
Сәләмәт сәм кәрәк көндәремә.
Текәлгәнмен ғаләм күҙҙәренә:
Ғәйрәт инһә башҡорт ирҙәренә -
Иман ҡайтыр торған ерҙәремә.


Был донъяны байтаҡ кистем инде.
Ярҙам кәрәк булһа - бына иңем.
Кәңәш кәрәк булһа - салт зиһенем.
Ил хәстәрләр ҡатын һүҙҙәренә
Ҡолаҡ һалығыҙ бер, тиеүем.