Бөтә яңылыҡтар
Дөйөм мәҡәләләр
20 Май 2019, 11:52

Аҡса юҡ, ашарға етмәй, кейемем туҙҙы, тип зарланғандар хаталана. Беҙҙең арала бай һәм етеш йәшәгәндәр ҙә байтаҡ.

Үткән аҙнала “Рәсәй һаҡлыҡ банкы”ның президенты Герман Греф Рәсәй телевидениеһы аша ҙур ғына интервью бирҙе. Хоҙайға шөкөр, ярай әле, банкирҙар бар, улар булмаһа, туҙған кейем менән аслы-туҡлы йөрөр инек. Был осраҡта банк кредитына алынып, бурысты ҡайтарғансы туҙған кейем-һалым хаҡында яҙып тормайыҡ. Грефтың кәйефе шәп, миллиард доллар һымаҡ күренә. Шулай булмағайы, йыллыҡ эш хаҡың миллиард һум булһын да, һытылған йөҙ менән уңыштар хаҡында һөйлә, имеш. Тел төбөнән шул аңлашыла, улар 2000 йылдар башында Рәсәйҙе олигархтарҙан ҡотҡарып ҡалғандар. Тимәк, беҙ, ябай халыҡ, мәңге бурыслы булырға тейешбеҙ.

Ғибрәтһеҙ генә бер миҫал, быйыл дүрт айҙа “Рәсәй һаҡлыҡ банкы” 293 миллиард һум саф табыш алған. Әллә беҙҙең кеҫәләрҙән һурғанмы? Греф киләһе йылдарға ипотеканы 8 процентҡа төшөрөргә вәғәҙә итә. Рәхмәт яуғыры, ә ни өсөн ошо ипотека “Рәсәй һаҡлыҡ банкы” ныҡлы тамыр йәйгән Чехияла 2-3 процент, ҡулланыу кредиттары 8-9 проценттан артмай? Ҡалған сығымдар дәүләт ярҙамында дотациялана. Рәсәй халҡы бындай ярҙамға әллә лайыҡ түгелме? Әлбиттә, ике тапҡыр тыңлап, Греф ауыҙынан был хаҡта ишетмәнем. Сөнки юғарыла иҫкә алған табыш 293 миллиард һум бөтәһенә лә яуап бирә. Байҙар байыясаҡ, ә фәҡирҙәр бөләсәк.