Бөтә яңылыҡтар
Дөйөм мәҡәләләр
16 Май 2019, 11:04

Мостай Кәримдең 100 йыллығына арналды. Шағир иҫтәлегенә почта маркалары сығарылды.

Өфөнөң “Главпочтамт” бинаһында бөйөк замандашыбыҙ Мостай Кәримдең йөҙ йыллығы айҡанлы сығарылған почта маркаларын мисәтләү тантанаһы үтте. Тантанала БР Мәҙәниәт министры Әминә Шафиҡова, Матбуғат һәм киң мәғлүмәт саралары агентлығы етәксеһе Борис Мелкоедов, Өфө ҡалаһы хакимиәте башлығы Өлфәт Мостафин, УФПС-тың Башҡортостан идаралығы етәксеһе Ирек Ғәлимов һәм шағирҙың ҡыҙы Әлфиә Кәримова, яҙыусылар ҡатнашты.

Тантаналы ҡатнашыусыларға Мәскәү филателистары заманса бәйләнеш сараһы – “Скайп” аша мөрәжәғәт итте. Мәскәү яғынан тантанала БР вәкиллеге етәксеһе, вице-премьер вазифаһын башҡарыусы Роман Симандуев, шағирҙың ейәне Мостай Кәрим исемендәге фондты ойоштороусы Тимербулат Кәримов, “Рәсәй почтаһы” генераль директоры Николай Подгузов ҡатнашты.
Әлфиә Мостафа ҡыҙы билдәләүенсә сара осраҡлы түгел, сөнки шағир Бөйөк Ватан һуғышында элемтәсе булараҡ хеҙмәтен башлаған, артиллерия дивизияһының элемтә начальнигы булған. Өҫтәүенә, 20 октябрҙә элемтәселәр көнөндә тыуған. Уның бөтә ижады төрлө кешеләр араһында изге һәм яҡты бәйләнештәр урынлаштырыуға арналған.