Шағир сыға. Ҡарағыҙ, һоҡланығыҙ, ул ниндәй мөһәбәт һәм матур. Алҡыштар. Шағир уҡый, халыҡ гөрләтеп ҡул саба һәм етди хатаға юл ҡуя. Шағир алҡыштарҙы өсөнсө шиғырға рөхсәт сифатында ҡабул итә һәм артабан уҡый. Әпәт алҡыштар. Шағир үҙенең үтә лә популяр икәнлегенә төшөнә һәм тағы берҙе уҡырға йөрьәт итә. Унан һуңғы шағир икене уҡыясаҡ тигәндәр хаталана, алдағы әҙип дүртте уҡығанда, быныһы бишәү менән яуап бирәсәк һәм шулай дауам итәсәк. Шуға ҡарамаҫтан, беҙҙең бәхеткә, шиғриәт һөйөүселәр күп, улар кисәгә киләсәк һәм гөрләтеп ҡул сабасаҡ. Әйҙә, шулай булһын.
Шиғыр кисәләре тураһында Рәшит Солтангәрәевтан ҡалған, бик таралмаған, бәлки, донъя ла күрмәгән лаҡаптарҙың береһе.
…Шиғыр кисәһе бара. Шағирҙар уҡталып-уҡталып шиғыр уҡый. Рәшит ағай Мостай Кәримдән һорай икән:
– Мостай ағай, нишләп беҙҙең шағирҙар ауыҙҙарына микрофон бер эләкһә, онло күнәккә башын тыҡҡан һарыҡ һымаҡ сәхнәнән китә лә, туя ла белмәй ул?
Мостай ағай тыныс ҡына итеп:
– Онон ашап бөткәс, шым ғына китһә, тағы бер хәл. Уның ҡайһы береһе мөгөҙөнә буш күнәкте эләктереп китә, – тип яуап биргән.
Мотлаҡ булмаған аңлатма: кемдәр ауылдан сыҡҡан, буш күнәкте мөгөҙөнә эләктереп, ҡайҙа барып һуғылырға белмәйенсә, башҡа һарыҡтарҙы өркөтөп сабыусы бахыр тәкәне күргәне барҙыр. Ошонан да мәрәкәрәк һәм ғибрәтлерәк тамашаның булыуы мөмкинме?
Беҙҙең бәхеткә, был күренеш беҙҙең әҙиптәребеҙгә ҡағылмай.