Ағиҙел
-11 °С
Болотло
75 лет Победы
Бөтә яңылыҡтар
Дөйөм мәҡәләләр
20 Апрель 2019, 11:09

Ал да нур сәс халҡыңа!

Кисә 19 апрелдә Өфөнөң “Башҡортостан” дәүләт концерт залының бәләкәй залында ҙур ваҡиға булды. Бөйөк шағирыбыҙ, дәүләт эшмәкәребеҙ Шәйехзада Бабичтың һәләк булыуының йөҙ йыллығына арналған, "Ал да нур сәс халҡыңа" тип исемләнгән хәтер кисәһе үтте. Башҡортостан Яҙыусылар союзы, БР Мәҙәниәт министрлығы тарафынан ойошторолған был сарала әҙәбиәт һәм мәҙәниәт өлкәләрендә республиканың Ш.Бабич дәүләт йәштәр премияһы лауреаттары, музыкаль һәм әҙәби ижад коллективтары сығыш яһаны.

Сығыштарҙа Шәйехзада Бабичтың шиғырҙары менән бергә замандаш йәш шағирҙарыбыҙҙың ижад емештәре яңғырауы үҙенсәлекле силсиләнең – рухи эстафетаның дауам итеүе тураһында һөйләгәндәй булды. Залды тултырып килгән тамашасыларҙы үҙенсәлекле бер транс хәленә еткергәнсе йырлап, бейеп, милли музыка ҡоралдарыбыҙҙа уйнаусы музыканттарыбыҙ Миңдеғафур Зәйнетдинов, “Арғымаҡ” этно-рок төркөмө, Артур Кәбировтар сығыштары, айырыуса Урал Әминевтың Шәйехзада Бабичҡа арналған бейеү башҡарыуы кисәне музыкаль яҡтан биҙәп, Бабичтың талантлы сәхнә оҫтаһы булыуына ишаралаһа, әҙиптәребеҙ, әҙәби ижадҡа яңы ғына аяҡ баҫҡан йәштәребеҙ сығыштары кисәнең мәғәнәүи, йөкмәткеле яғын байытты һәм шәйехзадалар һалған миллилек, рухлылыҡ орлоғоноң уңдырышлы тупраҡта шытым биреүе тураһында фекер төйнәргә мөмкинлек бирҙе. Ошо кисәлә БР һәм РФ Яҙыусылар союздарына яңы ағзалар ҡабул итеү тантанаһы ла ойошторолдо. Әҙәбиәт, ижад берләштерә шул. Йылы үтте тамаша.
Бөйөк шағирыбыҙ исемендәге премияларға лайыҡ булған шағирҙарыбыҙ сығыш яһамаһа, кисә үҙ маҡсатына өлгәшмәгән булыр ине. Тамашасылар Фәрзәнә Аҡбулатова, Зөлфиә Ханнанова, Тәнзилә Дәүләтбирҙина Лариса Абдуллина һәм Рәйес Түләктең шиғырын һөйләгән яҙыусы Айгиз Баймөхәмәтовтың сығышын алҡыштарға күмде.
Читайте нас в