Бөтә яңылыҡтар
Дөйөм мәҡәләләр
17 Апрель 2019, 11:05

Рәсәйҙәр өр-яңы тарихи рекорд ҡуйҙы. Әлегә И. В. Сталинды юҡһыныу буйынса.

“Левада-үҙәк” мәғлүмәттәренә ярашлы, ил тарихында Сталиндың ролен ыңғай баһалаусылар һаны 70 процентҡа еткән. Һорау алыуҙа ҡатнашыусыларҙың яртыһынан күбе Сталин репрессияларын аҡларға әҙер. 2015 йылдан бирле килгән Сталинды аҡлау йүнәлеше үҙенең тарихи бейеклегенә етте.

Һорау алыуҙа ҡатнашыусыларҙың 51 проценты Сталинға ҡарата һоҡланыуын һәм ыңғай ҡарауын йәшермәй. Ә юлбашсыға кире мөнәсәбәттә булыусылар (ҡурҡыу һәм ытырғаныу) һаны 14 процент.
Анкетаға яуап биреүселәр Сталиндың ил алдындағы хеҙмәттәрен күпселек ыңғай баһалай, ә 19 процент уға кире мөнәсәбәттә.
Был нимә, юлбашсыны аҡларға теләүме, әллә ҡаты ҡулды һағыныумы? Социологтар был һорауҙарға яуапты күптән эҙләй һәм сәбәбен Рәсәйҙә барған иҡтисади тетрәнеүҙәр, социаль ғәҙелһеҙлек, көрсөк менән аңлата. Йәнәһе, Сталин тере булһа, анау олигархтарҙы халыҡтан тартып алынған байлыҡтары менән бүлешергә мәжбүр итер, ҡаҙнаны талаусыларҙы ҡаты хөкөмгә тарттырыр, эш хаҡын, пенсияларҙы арттырыр ине, тип өмөт итә.
Иң юғарыла әлеге мәғлүмәттәргә иғтибар иткәндәр, ләкин уны ҡулланма итеп алыу йәки уға таяныу хаҡында мәғлүмәт юҡ. Иң мөһиме шул, илдең тын алышы билдәле. Ябай халыҡ бөгөнгөһөнә ҡарағанда яҡшыраҡ тормошҡа өмөт итә.