Ағиҙел
-18 °С
Болотло
75 лет Победы
Бөтә яңылыҡтар
Дөйөм мәҡәләләр
15 Апрель 2019, 11:27

Башҡорт телен уҡырға, өйәнергә һәм модаға индерергә. Еңел түгел, ләкин тормошҡа ашырырлыҡ.

Башҡорт теле һәм әҙәбиәте уҡытыусыларының беренсе бөтә Рәсәй съезы тарихта ҡалды. Әсә телен уҡытыу һәм өйрәнеү буйынса бик күп йылы һүҙҙәр әйтелде. Уҡытыусылар ҡанатланып, киләсәккә өмөт менән мәктәптәренә таралды. Республика етәксеһе Радий Хәбировтың: “Һеҙ ҡурҡмағыҙ, беҙ һеҙҙең менән”, – тигән һүҙҙәрен барлыҡ етәкселәргә асыҡтан-асыҡ күрһәтмә сифатында эштә төп ҡулланма итеп, ҡыйыу рәүештә тормошҡа ашырырға кәрәк. Беҙҙә үҙ эшенә мөкиббән уҡытыусылар бар, матди-техник база ҡәнәғәтләнерлек.

2016 йылда ШОС һәм БРИКС самиттарынан һуң, хәтерләйһегеҙме, Рәсәй Президенты В. В. Путин хәбәрселәргә нимә тип әйткәйне? Эйе, тап шулай, рус телен һәм башҡорт телен өйрәнегеҙ, тигәйне. Әйтте генә түгел, ҡәтғи күрһәтмә биргәйне. Үкенескә ҡаршы, был күрһәтмәне ул саҡтағы республика етәкселеге ҡабул итмәне, беҙ ҙә әүҙемлек күрһәтмәнек һәм өс йылды юғалттыҡ.
Заман бер урында тормай, яңынан-яңы талаптар ҡуя. Ул талаптар үтәлмәҫлек түгел. Тик уларҙы беҙҙең өсөн берәү ҙә тормошҡа ашырмаясаҡ. Барыһы ла үҙебеҙҙең эште ойоштора белеүебеҙҙән, талапсанлыҡтан, һәләтлелектән тора. Берәү ҙә инҡар итмәҫ, әсә теленә өйрәнеү ғаиләнән башлана. Әгәр беҙ үҙебеҙ һөйләшһәк, балаларыбыҙҙы өйрәтһәк, башҡаларға өлгө күрһәтһәк, башҡорт теленә ҡалғандар ҙа ылығасаҡ, өйрәнергә теләк белдерәсәк.
Фотола: Дәүләт Йыйылышы - Ҡоролтайҙа тәүгеләрҙән булып трибунанан башҡортса телмәр тотоусы депутат Әлфәрис Байсурин.