Ағиҙел
-24 °С
Болотло
75 лет Победы
Бөтә яңылыҡтар
Дөйөм мәҡәләләр
4 Апрель 2019, 13:21

Кисә берәү ҡоҙалашырға тәҡдим итте. Ризалашырғамы, юҡмы...

Үгеҙ һымаҡ, үҙенең маҡсатына күҙ йомоп ынтылыусылар була. Мин ундай кешеләргә һәр ваҡыт аҡ көнләшеү менән ҡарайым. Ысын мәғәнәһендә көслө, сыҙамлы, сәмсел кешеләр улар. Әле бына яңыраҡ шундай текә бер кеше менән интернетта яҙышып алдыҡ. Бер конкурста еңергә теләй икән танышым: “Фәлән конкурсты ойоштороусылар араһында һеҙҙең таныштарығыҙ юҡмы? Беренсе урын алһаҡ, өҫтәл әҙерләр инем. Йәшерен-батырыны юҡ, хәҙер бөтә ерҙә лә ҡоҙа-ҡоҙағыйлыҡ бит”, – тип, мине ҡыуандырҙы ла, хафаландырҙы ла.

Шатландырҙы, сөнки мин үҙемде ул дәрәжәлә үк һүҙе үтә торған кешелер, тип уйламай инем. Кемдер шулай фекерләй икән, минең өсөн был да насар түгел һымаҡ. Тимәк, маҡсатына баштар аша атлап ынтылғанда мине ярҙам итер, тип ышаналар. Ә был миңә кәрәкме?
Икенсенән, әлеге һорау йырып сыҡҡыһыҙ, хәл иткеһеҙ булыуы менән мине тәрән борсолоуҙарға дусар итте. Ни өсөн тиһәгеҙ, аңлатып үтәйем. Ниңәлер, белмәйем, әммә мин яһалма рәүештә ойошторолған еңеүҙәргә теше-тырнағы менән ҡаршы кеше. Аяғым аҫтында ятһа ла, үҙемдеке булмаһа, алмайым, бындай эш өсөн ҡыл да ҡыбырлатмай торған арҡырымын, ни хәл итәһең... Был кирелегем менән нисек көрәшергә, уны нисегерәк еңергә белмәй, күптән төн йоҡоларымды юғалтҡанмын. Әллә ризалашырға ла ҡуйырғамы? Минән ярҙам өмөт итеүсе танышым алдында ла уңайһыҙ. Әлеге ярышты ойоштороусы менән яҡын уҡ булмаһаҡ та, бер-беребеҙҙең мәҡәләләрен уҡыған таныштарбыҙ. Өндәшһәм, моғайын, һүҙемә ҡолаҡ һаласаҡ. Тик, әлеге лә баяғы, намыҫ ҡушмай ҙа ҡуя.
Уф, ошо яҙмам мине борсоған икеле уйҙарҙан арынырға ғына ярҙам итһен
инде, тип теләйем. Эшем – эш, ашым – аш, йоҡом – йоҡо түгел бит. Хөрмәтле
дуҫтарым, һеҙгә өндәшәм: һеҙ миңә ниндәй кәңәш бирерһегеҙ?
Читайте нас в