Ағиҙел
-17 °С
Болотло
75 лет Победы
Бөтә яңылыҡтар
Дөйөм мәҡәләләр
29 Март 2019, 10:51

Элекке губернаторҙарға һунар миҙгеле асыламы? Һәлмәктәрҙең береһен өйөнә бикләп ҡуйҙылар.

Мәскәүҙең Басман суды Хабаров крайының элекке губернаторы Виктор Ишаевты ике айға өйөнә бикләп ҡуйҙы. Туҡһанынсы йылдарҙа һәм әлеге быуат башында Рәсәйҙә сәйәси һәлмәктәр (политические тяжеловесы) ҙур ғына урын тота ине. Йоғонто һис тә мәңгелек түгел икән. Тәүҙә Виктор Ишаевты махсус хеҙмәттәр тотҡарлағандар һәм судҡа килтергәндәр.

Төрлө мәғлүмәттәргә ҡарағанда губернатор “Роснефть” компанияһына ҡараған ойошманың 5 миллион һум аҡсаһын үҙләштереүҙә ғәйепләнә. Ишаевтың һәм яҡындарының өйҙәрендә, офистарында тентеүҙәр үткәрелгән. Элекке етәксе үҙенең ғәйебен таныуҙан баш тартҡан.
Был осраҡ Рәсәйҙең яңы сәйәсәтендә беренсе тапҡыр түгел. Элекке һәм ғәмәлдәге губернаторҙар, һирәкләп булһа ла, енәйәт яуаплылығына тарттырыла. Мәҫәлән, Сахалин өлкәһенең элекке башлығы Александр Хорошавин ҡаты режимлы колонияға 13 йылға хөкөм ителде. Коми Республикаһы губернаторы Вячеслав Гайзер эше буйынса, бына өс йыл инде, тикшереү дауам итә. Киров өлкәһе губернаторы Никита Белых 8 йыл ғүмерен төрмәлә үткәрәсәк. Марый Иле, Удмурт Республикаһының элекке губернаторҙары һаман да суд ҡарары көтә.
Рәсәй яңы тормошҡа яраҡлаша. Закон алдында бөтәһе лә яуаплы. Енәйәт ҡылған ябай кеше лә, юғары вазифалы түрә лә законға буйһонорға тейеш.

Фото: tass.ru