Бөтә яңылыҡтар
Дөйөм мәҡәләләр
21 Февраль 2019, 10:36

В. В. Путин тағы ла аптыратты. Беҙ халыҡ көткән һүҙҙәрҙе ишеттек.

20 февралдә РФ Президенты В. В. Путин Федераль Йыйылышҡа сираттағы мөрәжәғәтнамә менән сығыш яһаны. Был сығыш, былтырғыһынан айырмалы, социаль һәм демографик проблемаларҙы хәл итеүгә арналды. Былтыр, иҫкә төшөшөрәйек, Рәсәй Президенты сығышының төп өлөшөн илдең абруйын күтәреү, оборона ҡеүәтен нығытыуға арнағайны. Был мәсьәлә хәл ителде, тип иҫәпләргә нигеҙ бар. Быйылғы мөрәжәғәтнамәлә төп урынды халыҡтың матди хәлен яҡшыртыу, ғаилә ҡиммәттәрен нығытыу, йәш ғаиләләрҙе ҡурсалау, мөмкинлектәре сикләнгәндәрҙе иҡтисади йәһәттән яҡлау, пенсионерҙарға түләүҙәрҙе арттырыу кеүек көнүҙәк мәсьәләләр алып торҙо.

Былар барыһы ла халыҡ көткән, күпселек ишетергә теләгән һүҙҙәр. В. В. Путиндың сығышында яңғыраған тәҡдимдәр ифрат ваҡытлы ишетелде. Әлбиттә, Президенттың Хөкүмәткә күрһәтмәләре һәм тәҡдимдәре байтаҡ ҡына финанс сығымдары талап итәсәк. Президент һөйләгәндә, айырыуса, аҡса, өҫтәмә түләүҙәр тураһында һүҙ сыҡҡанда, операторҙар алмаш-тилмәш Хөкүмәт рәйесе Д. А. Медведевты һәм финанс министры А. Г. Силуановты күрһәттеләр. Икеһе лә тыныс күренде, тимәк, аҡса бар, түләүҙәр буласаҡ, тип ышанырға ҡала.