Бөтә яңылыҡтар
Дөйөм мәҡәләләр
31 Ғинуар 2019, 13:50

Качкаев “соҡоп” бөтмәйенсә, депутатлыҡҡа “шылған”. Өфөнән көнсығышҡа сығыу юлы, ниһәйәт, ғәмәлгә ашырмы?

Кеше аҡылының көсөнә һәм ҡеүәтенә ғәжәп итерһең. Ер шарында йыл һайын йөҙҙәрсә километр тоннель, метро, ер аҫты юлдары төҙөлә. Ә бына Өфө ҡалаһында бына нисә йыл инде, Салауат проспектынан Өфө йылғаһына тиклем ер аҫты үткәргесе, йылға аша күпер, М-5 трассаһына тиклем юл төҙөй алмайбыҙ. Әйткәндәй, ҡаҙандар метроның ҡасан төҙөлгәнен онотто. Ә беҙ Ельцин бабайҙың нисәнсе йылда: “Бында метро буласаҡ”, – тигән капсуланы ҡайһы ерҙә күмеп киткәнен дә оноттоҡ.

Иҫкә төшмәҫ ине, әгәр республикала власть алышынмаһа, Радий Хәбиров Дәүләт Думаһы депутаттары менән осрашмаһа, Мәскәү юлды төҙөп бөтөүгә 1,5 миллиард һум аҡса вәғәҙә итмәһә. Беҙҙең депутаттар аҡсаны Өфөгә йәлеп итеү өсөн тырыша икән.
Радий Хәбиров та ошо уҡ маҡсат менән Рәсәйҙең транспорт министры Евгений Дитрих менән осрашасаҡ.
Дәүләт Думаһы депутаттары менән берлектә үткәрелгән Хөкүмәт ултырышында Радий Хәбиров көнсығыш юлға бәйле Өфө ҡала хакимиәтенең элекке башлығы, Дәүләт Думаһының хәҙерге депутаты Павел Качкаевҡа төбәп: “...Павел Рюрикович заманында уйлап сығарылған, ул “соҡоп” бөтмәйенсә, беҙгә ҡалдырған һәм депутатлыҡҡа “шылған”, – тип, өр-яңы ҡанатлы һүҙҙәр осороп ебәрҙе.
Дәүләт Думаһындағы Башҡортостан депутаттары Рәсәй ҡаҙнаһынан төбәктәге ун ике проектты тормошҡа ашырыу буйынса финанслау йәһәтенән эшләйәсәк.
Көнсығыш юл үткәргесте төҙөп бөтөргә һәм ҡасан төҙөлгәнен оноторға ваҡыт инде.
--------
Интернеттан алынған фотола: Дағстандағы Гимри автомобиль үткәргесе. Әгәр беҙҙеке төҙөлһә, ошолайыраҡ буласаҡтыр.