Бөтә яңылыҡтар
Дөйөм мәҡәләләр
30 Ғинуар 2019, 12:01

Хәбиров үҙе тотонғас, ышаныс бар. Әйҙәгеҙ, күмәк көс менән беҙ ҙә ҡушылайыҡ!

Башҡортостан ауылдарында һәм ҡалаларында суррогат эсемлектәр менән сауҙа итеүгә ҡаршы көрәш башланды. Тәүге көндәрҙә үк байтаҡ законһыҙ нөктәләр фашланған. Был хаҡта Радий Хәбиров социаль селтәрҙәр аша белдерҙе, барлыҡ күҙәтеү һәм көс структураларына контрафактты бөтөрөү буйынса ҡәтғи саралар күрергә ҡушты. “Ысынында иһә, был, йәнәһе, “бизнесмендар” беҙҙең халыҡты ҡырыу менән шөғөлләнә. Улар һатҡан эсемлектәрҙе һатыу һөҙөмтәләре бөтәбеҙгә лә яҡшы билдәле. Йыл һайын тиҫтәләрсә мең фажиғә һәм ҡыйралған яҙмыштар”, – тип билдәләне республика етәксеһе.

Ағыулы эсемлектәрҙе һатыуҙы туҡтатыу өсөн барлыҡ законлы алымдар ҙа файҙалы. “Үлем менән сауҙа итеүҙе хәҙерҙән туҡтатыу хәйерле. Һәр райондың һәр бәләкәй ауылына барып етәсәкбеҙ”, – тип баҫым яһаны Радий Хәбиров.
Хәтерегеҙгә төшөрәбеҙ, 14 ғинуарҙа “Ағиҙел” һәм “Һәнәк” журналдары, “Башҡорт ҡатын-ҡыҙы” төркөмө менән берлектә, “Минең тормошомда эскелеккә урын юҡ” ижади эштәр конкурсы иғлан иткәйне. Еңеүселәр өсөн тос ҡына бүләктәр ҙә ҡаралған. Ифрат ҡыҙыҡлы материалдар килде, уларҙың байтағы беҙҙең сайттарҙа һәм “Башҡорт ҡатын-ҡыҙы” төркөмөндә донъя күрҙе. Был эште барлыҡ республика кимәлендә йәйелдереү ҙур өмөт уята. Ысынлап та, халыҡ эскеселәрҙән, ағыулы спиртлы эсемлектәр һатыусыларҙан йонсоған. Бындай законһыҙ күренештәргә ҡаршы көрәшергә кәрәк. Әйҙәгеҙ, барыһын да власть органдарына ғына йөкмәтеп ҡуймайыҡ, үҙебеҙ ҙә ҡушылайыҡ, бергәләп көрәшәйек.
Читайте нас в