Бөтә яңылыҡтар
Дөйөм мәҡәләләр
25 Ғинуар 2019, 13:09

Был буранда өйҙә генә ултырырлыҡ. Беҙ һеҙгә йәтеш эш таптыҡ.

Йома бураны бөтәбеҙҙе лә аптыратты. Эшкә барырлыҡ, барһаң, өйгә ҡайтырлыҡ түгел. Синоптиктар ҙа оҫтарҙы, ваҡытында һәм теүәл итеп һауа торошон билдәләп баралар. Бөгөн 25 ғинуарҙа буранлы һәм һыуыҡ буласаҡ. Ә шәмбе көн бер аҙ ҡар, еңелсә буран менән ҡыуандырмаҡсы. Һауа температураһы бөгөнгөсә тип әйтерлек, һалҡын булыуы ла бик ихтимал. Ә йәкшәмбе, тамам хөрриәт, еңелсә ҡар, еңелсә буран, шулай ҙа урамға ашыҡмағыҙ. Һауа температураһы урыны менән 26-31 булмағайы.

Бындай ғына бурандарҙы күргән бар. Шулай ҙа ит йәрминкәһендә йомошоғоҙ булмаһа, өйҙә генә ултырыуығыҙ хәйерле. "Бәйләнештә"ге төркөмөбөҙҙә, журналыбыҙ сайтында Салауат Әбүзәрҙең “Кисенбикә юлы” повесын ике меңгә яҡын кеше уҡып өлгөрҙө. Мауыҡтыра һәм тетрәндерә. Бынан тыш, Салауаттың “Мәмерйә”һе, Әхмәр Ғүмәр-Үтәбайҙың “Эстафета”һы смартфонығыҙҙы, йә компьютерығыҙҙы, буранды онотоп уҡырлыҡ.

Юлға сыға күрмәгеҙ, хәйерле көндәр һеҙгә!