Бөтә яңылыҡтар
Дөйөм мәҡәләләр
18 Ғинуар 2019, 20:23

Яҙыусы Флүр Ғәлимовтың эшҡыуарлыҡ менән дә шөғөлләнеүе күптәргә мәғлүм. Хәҙер ул ҡәләмдәштәрен йорт-ерле итергә теләй.

Заманында әҙәбиәткә “Яңы башҡорт” романы менән килгән Флүр Ғәлимов былтыр Мәскәүҙә сыҡҡан китаптары һәм журналдарҙа баҫылған әҫәрҙәре менән барыһын да шаҡ ҡатырғайны, бер романы инглиз теленә тәржемәләнә. Ғәжәпләндереү артабан да дауам итә.

Яҙыусы үҙенең эшҡыуар коллегалары менән Өфө эргәһендә байтаҡ ер һатып алған һәм ошонда торлаҡ төҙөлөшө менән шөғөлләнергә теләй. Флүр Миңшәриф улы билдәләүенсә, яңы ауыл урамдарының береһендә ҡырҡ-илле участок торлаҡҡа мохтаж яҙыусыларға һәм журналистарға бүленәсәк.
Бирһен хоҙай, Өфө ҡалаһында бындай эш менән күптән шөғөлләнеүсе юҡ ине. Яҙыусының изге маҡсаттарының тормошҡа ашыуын теләйбеҙ. Кем белә, бәлки был хаҡта өр-яңы роман да ижад ителер, әҫәр лайыҡлы баһаһын да алыр, тип көтәбеҙ.