Бөтә яңылыҡтар
Дөйөм мәҡәләләр
16 Ғинуар 2019, 17:00

Һатыусылар һәм водителдәр, әҙерләнегеҙ. Сиратта – юристар, бухгалтерҙар, иҡтисадсылар, полицейскийҙар.

Аналитиктар оҙаҡламай ғәмәлдән сығасаҡ һөнәрҙәрҙең исемлеген төҙөгән. Роботлаштырыу шауҡымы иң тәүҙә сауҙа һәм транспор-ташыу хеҙмәткәрҙәренә ҡағыласаҡ. Ярай, һатыусыларһыҙ йәшәргә өйрәнербеҙ. Мәҫәлән, тауар йәки аҙыҡ-түлек өйөлөп ята, һайлап алаһың да, касса һымаҡ урында штрих-кодын күрһәтәһең, теге нәмә сумманы сығара, картаны төртәһең, аҡсаһын иҫәпләп ала. Ә бына машиналар тулы урамда робот-водитель менән нисек йөрөрбөҙ икән? Әлегә был хаҡта өндәшмәйҙәр.

Бухгалтер, иҡтисадсы халҡының ғүмере сикләнгәнлеген тойомлайбыҙ, компьютерҙар уларҙы алмаштырыр, юристарһыҙ ҙа йәшәп булыр, ә бына полицейскийҙар беҙһеҙ нимә эшләр икән? Кемгә штраф, кемгә ришүәт һонороға? Аңҡы-тиңке килеп йөрөргә тура килерме икән?
Ышанмай, сара юҡ, донъя алға бара, уны бер нисек тә туҡтатып булмай. Бынан егерме йылдыр элек кеҫә телефонының нимә икәнлеген дә белмәй инек. Ә хәҙер ул беҙгә тамам хужа булып алды, йәшәү рәүешенә әйләнде һәм аңдарыбыҙҙы томаланы. Шунан һуң һатыусылар һәм водителдәр һөнәрҙәре юҡҡа сығасаҡ тигәнгә ышанмай ҡара инде.
Фото http://plus-one.rbc.ru сайтынан алынды.