Бөтә яңылыҡтар
Дөйөм мәҡәләләр
24 Декабрь 2018, 11:12

Һөйөнсө! Быйыл йәй бишенсе Ҡоролтай буласаҡ. Уйлайыҡ, тик ул беҙгә кәрәкме?

Үткән йома Бөтә донъя башҡорттары Ҡоролтайы конгресы ултырышында Башҡортостан автономияһының 100 йыллығы айҡанлы бишенсе Ҡоролтайҙы үткәреү хаҡында тәҡдим булды. Һуңғы йыйылыуыбыҙға 3 йыл да үтмәне, тағы ла бер ҡоролтай. Һылтау бик етди һәм кире ҡаҡҡыһыҙ тип әйтерлек. Автономияның 100 йыллығы айҡанлы тағы бер йыйылып, һил һауаны һелкетеп, бер-беребеҙҙе тәнҡитләп, маҡтанышып (тик нимә өсөн?), уйнап-көлөп, йырлап-бейеп, һәм, әлбиттә, ашап-эсеп, тағы бер нисә йылға, эшемде ҡырҙыҡ, тигән ҡиәфәт менән, барлыҡ мәшәҡәттәрҙе онотайыҡ.

Мәктәптәрҙә башҡорт телен уҡытыу кәмей, уҡытыусылар эшһеҙ ҡала. Дәүләт теле булараҡ башҡорт теленең ҡулланыу даирәһе юҡ кимәлендә. Башҡорттар күпләп йәшәгән төбәктәрҙә эшһеҙлек, эскелек, өмөтһөҙлөк төп проблема булып тора. Автономияның 100 йыллығы, белеүемсә, барлыҡ халыҡтар, йәғни, дәүләт байрамы. Тимәк, республикабыҙҙа йәшәүсе халыҡтар: урыҫтар, татарҙар, сыуаштар, марийҙар, удмурттар һәм башҡалар шундай уҡ йыйын үткәрергә хаҡлы. Әлегә улар өндәшмәй. Ҡоролтайҙа ултырыусылар, бәлки, 2020 йылда Рәсәй халыҡ иҫәбен алыу кампанияһы һымаҡ милләтебеҙҙең яҙмышын хәл итер сара үткәрелеүен белмәйҙәрҙер, йә онотҡандарҙыр. Нимә, беҙгә тағы Ҡоролтайға йыйылырға һәм былай ҙа тарҡау халҡыбыҙҙы тупланырға саҡырырғамы? Ошо хаҡта нисек уйлайһығыҙ?
Читайте нас в