Бөтә яңылыҡтар
Дөйөм мәҡәләләр
14 Декабрь 2018, 19:42

Урал менән Шүлгән сәхнәгә күтәрелде

Алдан хәбәр итеүебеҙсә, Театр йылын М. Ғафури исемендәге Башҡорт дәүләт академия драма театры “Урал батыр” эпосы буйынса ҡуйылған спектакль менән асты. Үлемһеҙлек тураһындағы ҡобайыр сәхнәлә яңғырап, тамашасыны яҡшылыҡ һәм яманлыҡ, тоғролоҡ һәм хыянат, дөрөҫлөк һәм ялған һ.б. тураһында тағы бер ҡат уйланырға мәжбүр итте, ойоп барған күңелдәрҙе һиҫкәндереп ебәрҙе.

Билдәле яҡут режиссеры, Рәсәйҙең халыҡ артисы, СССР-ҙың, Рәсәйҙең, Саха (Яҡут) республикаһының дәүләт премиялары лауреаты Андрей Борисов спектаклдең авторы булараҡ сығыш яһай, ул ил халыҡтары эпостарын өйрәнеү менән күптән шөғөлләнә.
Эпик спектаклдең төп символик атрибуттарының береһе – ағас кәмә. Ул геройҙарҙы бер донъянан икенсеһенә күсереп ҡотҡара, йә уларҙың аяҡ аҫтына юл булып түшәлә, йә уй-фекерҙәрҙе белдереү өсөн үҙенсәлекле подиумға әүерелә. Ә көй... Урал Иҙелбаев, һәр ваҡыттағыса, юғары аһәң тыуҙырыуға өлгәшкән.
Спектаклдә бөтөн труппа ҡатнаша тиерлек. Төп ролдәрҙә – йәш, әммә танылған сәхнә оҫталары Ринат Баймырҙин менән Руслан Хайсаров. Урал һәм Шүлгәндең бәләкәй сағын Илназар Әхмәтйәнов, Ислам Суфиянов кәүҙәләндерә. Эпосты һөйләгән Сәсән ролендә – Сәғиҙулла Байегет.
Олег Яровиков фотоһы.
Читайте нас в