Ағиҙел
-11 °С
Болотло
75 лет Победы
Бөтә яңылыҡтар
Дөйөм мәҡәләләр
14 Декабрь 2018, 13:28

Туҙға яҙылған һәм туҙға яҙылмаған исемдәр. Өфө ҡалаһында 16 яңы урамға исемдәр бирелде.

Урам исемдәре, белеүемсә, дәүләт телдәрендә яҙылырға тейеш. Тик уларҙы нисек тәржемә итерҙәр икән? Әйткәндәй, бөгөн башҡорт теле көнө. 13 декабрҙә Өфө ҡала советы депутаттары комиссияһы Киров исемендәге, Октябрь, Дим райондарындағы яңы урамдарға исем ҡушыу һымаҡ ҙур эш башҡарҙы. Иғтибар итегеҙ, был исемдәр баш ҡалабыҙҙы һәм уның биҫтәләрен биҙәп торасаҡ.

Дим районында Красивая поляна (Матур аҡлан) урамы, Маҡтаулы тимер юлсы Иван Спатар, Рәшит Мануров, Урал Рәжетдинов, Фёдор Креков урамдары, Дмитрий Волков исемендәге бульвар барлыҡҡа киләсәк. Үкенескә ҡаршы, юғарыла һаналғандарҙың береһен дә белмәйем, һәр хәлдә, лайыҡлы кешеләрҙер, тип уйлайым. Киров районында Академик Ғатауллин урамы буласаҡ. Уның хаҡында уҡығаным бар, хуплайым.

Нуғай ҡасабаһын Баҡсаһарай, Берестяная (Ҡайын туҙы), Беловежская (СССР-ҙы юҡ иткән сауҡалыҡ иҫтәлегенәме икән), Лютиковая, Облачная, Прелестная, Июльская, Нектарная (уф, аҙағына сыҡтым) урамдары биҙәйәсәк.

Һиҙәһегеҙме, исемдәр бер яҡлы, йәғни тенденциоз. Мин, мәҫәлән, Өфөлә егерме йыл йәшәп, Шәйехзада Бабич урамын күргәнем түгел, унда йәшәгән йәки ошо урамды күргән кешене ошо көнгәсә күргәнем юҡ. Бәлки ҡайҙалыр атаҡлы драматургтар Нәжип Асанбаев, Флорид Бүләков, яҙыусылар Денис Бүләков, Әхмәт Сөләймәнов, Ирек Кинйәбулатов, Сафуан Әлибаев, Академик Нияз Мәжитов, ғалимдар Роберт Байымов, Ринат Йосопов һәм башҡа бик күп хөрмәтле башҡорт арҙаҡлыларының исемдәрен йөрөткән урамдар, тыҡырыҡтар, бульварҙар барҙыр. Бәлки, ишетмәй ҡалғанмындыр. Шулай ҙа Өфө ҡалаһын туҙға яҙмаған исемдәр биҙәренә шикләнәм. Ә һеҙ был хаҡта нисек уйлайһығыҙ?

Читайте нас в