Бөтә яңылыҡтар
Дөйөм мәҡәләләр
7 Декабрь 2018, 14:10

Лукашенко менән Путин бәхәсләшкәндә... Кинәйәле ҡисса иҫкә төшә. Был хаҡта һуңыраҡ.

Санкт-Петербургта Евразия иҡтисади союзының сираттағы ултырышында Белоруссия президенты Лукашенко Рәсәйҙән бушлай тип әйтерлек газ алырға теләп, сираттағы тапҡыр Рәсәй Президенты Путин менән бәхәсләшә башланы. Лукашенко әйтеүенсә, Белоруссияла газ 1000 кубометрға 130 доллар торһа, Смоленск өлкәһендә – 70 доллар ғына. Ике тапҡырға арзан, был ғәҙел түгел һәм ошондай шарттарҙа нисек конкуренцияны ҡорорға?

Был дәғүәгә В.В. Путин һәр ваҡыттағыса бик тос яуап бирҙе: “Эйе, иғтибарығыҙҙы йүнәлтәм, бөгөн 129 доллар, киләһе йылға 127 доллар буласаҡ, ә Германияла 250 доллар. Евразия иҡтисади союзы ағзалары өсөн өҫтөнлөк шунда түгелме ни?”
Белоруссия Рәсәйҙән арзанлы кредиттар, ярты хаҡына нефть-газ алып, яман өйрәнеп китте шул. Ошо урында бөгөнгө һөйләшеүгә бер мөнсәбәте булмаһа ла, ҡисса иҫкә төшә.
...Бер өйҙә эт менән бесәй йәшәгән. Бесәйҙең алдына ашарға һалған һайын: “Аҙ һалалар, үҙҙәренә күберәк ҡала, мине ашатмайҙар, ана өҫтәлдәре һығылып тора, минән йәлләйҙәр”, – тип, асыулы ыҫылдай икән.
Ә тышта, ояһында, эт ҡышҡы һыуыҡта ҡалтыранып ята һәм: “Бөгөн дә ашарға эләкмәне... Хужа үҙе лә астыр инде, минең ҡайғы юҡтыр, ярай, бер көн ашаттылар, бөгөн булмаһа, иртәгә аҙыҡ булыр”, – тип, үҙен тынысландыра икән.