Бөтә яңылыҡтар
Дөйөм мәҡәләләр
28 Ноябрь 2018, 11:28

Башҡорт яҙыусыһы Мәскәүҙе яулай. Яҡташ яҙыусының әҫәрҙәре Мәскәү нәшриәттәрендә донъя күрә.

Быйыл декабрҙә 60 йәшен билдәләйәсәк башҡорт әҙибе Флүр Ғәлимов китап һөйөүселәргә “Йүләр”, “Яңы башҡорт”, “Аҙғын тәүбәһе” романдары һәм мауыҡтырғыс хикәйәләре менән яҡшы таныш. Ике йыл элек, хатта, “Аҙғын тәүбәһе” Салауат Юлаев исемендәге Дәүләт премияһына дәғүә итте.

Флүр Ғәлимов быйыл Мәскәүҙең “Художественная литература” нәшриәтендә “Покаяние над пропастью” трилогияһын сығарып, бөтәһен дә шаҡ ҡатырҙы. Был китапты Европа илдәренең тиҫтәләрсә уҡыу йорто һәм китапханалары заказ буйынса һатып алған. Яңы ғына әҙәбиәтселәр атаҡлы “Роман-газета” серияһында Флүр Ғәлимовтың “Златокрылая птица Хумай” романын ҡулдарына алды. Әйткәндәй, һуңғы тапҡыр башҡорт яҙыусыһының әҫәре “Роман-газета”ла утыҙ йыл элек сыҡҡан. Ул да булһа, бөйөк Мостай Кәримдең “Ярлыҡау” повесы.
Бөтөн донъяға билдәле әҙәбиәт тәнҡитсеһе Лев Аннинский яҡташыбыҙҙың ижады хаҡында мәҡәлә әҙерләй. Етмәһә, әлеге мәлдә Мәскәү редакцияларының береһендә Флүр Ғәлимовтың әҫәре “Тыйылған емеш тәме” исеме менән инглиз теленә тәржемә ителә.