Ағиҙел
-17 °С
Болотло
75 лет Победы
Бөтә яңылыҡтар

Ҡоллоҡ

Әбүзәрҙән шиғри күстәнәс

Салауат ӘБҮЗӘР
Ҡоллоҡ
(Уйынлы-ысынлы)
Ҡол биләүселек дәүере
Тарихта ҡалған, тиҙәр.
Имеш, кешеләр тормошта
Азатлыҡ алған, тиҙәр.
Ялған һөйләйҙәр. Ҡараһаң,
Ҡолдар ни донъя тулы:
Кемдер – вазифалар ҡоло,
Кемдәрҙер – аҡса ҡоло.
Кемдер ғүмер буйы эш тип,
Бығау һалған ҡулына.
Кемдер йөрөй әүерелеп
Ялҡаулыҡтың ҡолона.
Шешә ҡоло... Бисә ҡоло...
Йыһаз ҡоло... Аш ҡоло...
Ҡотолоу юҡ был ҡоллоҡтан, –
Хет ерҙе тырнап оло.
Ҡол биләүселек дәүере –
Беҙ һайлаған юл бит ул.
Ерҙә бер кем азат түгел,
Һин дә, мин дә ҡол бит ул!