Бөтә яңылыҡтар

Салауат ӘБҮЗӘР. Күк ҡабағы

(Ҡәҙер төнөндә күк ҡабағы асылһа, теләктәр ҡабул була, ти) Йәшәй-йәшәй был донъяла, Тормош бирҙе һабағын: Күк ҡабағы асылманы, Асылды күҙ ҡабағым.

Күктән һорағандар күптән
Алдымда ята икән:
Минең бәхет булып гөлдәр
Сәскәләр ата икән.
Минең бәхет булып ҡоштар
Һай(ы)рай ҙа һай(ы)рай.
Бәхет булып ҡояш ҡалҡа,
Бәхет булып ай урай...
Бәхет үҙем менән икән, –
Ниңә ҡыуып сабаһы?!
Ошо яҡты донъяға тик
Асылһын күҙ ҡабағы!